10 Korrik 2021

Projekti për Siguri Ushqimore ndihmoi përmes asistencës së tij Ministrinë e Bujqësisë dhe Zhvillimit Rural (MBZHR), Autoritetin Kombëtar të Veterinarisë dhe Mbrojtjes së Bimëve (AKVMB) dhe Autoritetin Kombëtar të Ushqimit (AKU) për emergjencën e Infulencës Aviare apo siç njihet, Gripin e Shpendëve, pas zbulimit të disa vatrave në Shqipëri.

Pas një takimi me përfaqësues të Projektit për Siguri Ushqimore, MBZHR-së, AKVMB-së dhe AKU-së, u hartua një plan i dedikuar komunikimi me qëllim informimin e fermerëve dhe konsumatorëve mbi Gripin e Shpendëve si edhe masave të duhura të kontrollit.

Postera informues, fletëpalosje, pyetje e përgjigje përmes infografikëve u hartuan dhe u shpërndanë në të gjithë vendin përmes veterinerëve të AKVMB-së dhe inspektorëve të AKU-së.

Në postërat informues për fermerët u përfshinë edhe informacione dhe kontakte të veterinerëve për secilin rajon, për të rritur edhe ndërgjegjësimin për rolin e AKVMB-së si Autoritet i ngritur rishtaz dhe punën e bërë për gjurmimin dhe raportimin e shpendëve të sëmurë apo të ngordhur, identifikimin dhe transportimin e tyre.

Ndërsa fletëpalosjet për ndërgjegjësimin e konsumatorëve u hartuan për të siguruar qytetarët se gjithsesi, konsumi i mishit të pulës dhe i vezëve është i sigurt. Posterat dhe fletëpalosje përmbanin udhëzime për konsumatorët për ndjekjen e praktikave të mira të higjenës si larja e duarve si edhe gatimi i plotë i mishit të pulave dhe i vezëve.

Me financimin e Bashkimit Evropian, Projekti “Mbështetje për Standartet e Sigurisë Ushqimore, Veterinare dhe Fitosanitare” vihet në zbatim nga një grup i udhëhequr nga Autoriteti i Sigurisë Ushqimore në Irlandë (FSAI). Grupi zbatues përfshin gjithashtu Autoritetin e Ushqimit në Finlandë, Departamentin e Bujqësisë, Ushqimit dhe Marinës në Irlandë dhe Creative Business Solutions (CBS) në Shqipëri.